د لمانځه فضيلت

د لمانځه د فضيلت په بيان کي

فايده: دا پنځه شيان  داسلام مهم او ضروري ارکان دي. نبي (ص) په دې مبارکه  وينا  کي اسلام د خېمې  په شان ګرځولی دئ او پنځه  ستني يې ورکړيدي. کلمه  د منځ  د ستني  په څېر ده او هغه  نور څلور  شيان د څلورو کونجانو  د ستنو په څېر  دي، د منځ لرګی چي نه وي خېمه نه سي درېداى او که د منځ لرګی موجود وي که څه د څلورو طرفو  لرګيان  يې نه وي بيا هم  خېمه  درېدای سي، خو د کوم  لوري  لرګی چي نه وي  هغه لورى کمزوری او پرېوتلى وي. د دې پاک ارشاد څخه  وروسته  موږ  ته پر خپل  حالت باندي  فکر او غور  په کار دئ، چي موږ د اسلام خېمه تر کومه ځايه پوري درولې ده  او د کوم رکن  مو پوره خيال ساتلى دئ. دا پنځه  رکنونه ډېر ضروري دي آن تر دې چي د اسلام  بنسټ  هم دا پنځه شيان ښودل سوي دي او يو مسلمان  ته د مسلمان  په  حيث د پنځو  سرو اهتمام  ضروري  دئ، خو په دوی کي تر ټولو  دوهم  ضروري لمونځ دئ. حضرت عبد الله ابن مسعود (رض) فرمايي: ما د  نبي (ص) څخه پوښتنه وکړه، چي الله (ج) ته تر ټولو خوښ کوم شى دئ؟

رسول الله (ص) وفر مايل: لمونځ  دئ.  ما وويل تر دې وروسته  کوم شى الله (ج) ته خوښ دئ؟ رسول الله (ص) وفرمايل: د مور او پلار سره ښه سلوک کول. ما ورته وويل تر دې وروسته  کوم شى الله (ج) ته ډېر خوښ دئ؟ رسول الله (ص) وفرمايل: جهاد کول.

ملا علي قاري (رح) فرمايي: په دغه حديث کي علماوو ته د دې خبري د ثبوت  دليل دئ، چي  تر ايمان وروسته  مهم شى لمونځ دئ  او د دې خبري ثبوت هم کېږي، چي وايي (الصلوة خير موضوع) يعني لمونځ الله (ج) د خپلو بندګانو لپاره غوره شى ټاکلى دئ. په نورو صحيحو  حديثونو کي دا خبره په ښکاره  الفاظو  بيان سوېده، چي بهترين  عمل لمونځ دئ، لکه په جامع صغير  نومي کتاب کي چي دا حديث  د ثوبان، ابن عمر، سلمة ، ابو امامة  او عبادة (رض) څخه رانقل سوی دئ. د ابن مسعود (رض) او انس (رض) څخه لمونځ پر خپل وخت کول تر  ټولو عملونو غوره عمل رانقل سوى دئ(۲).

د حضرت ابن عمر (رض)  او ام فروة (رض) څخه په اول وخت کي لمونځ کول تر ټولو عملونو غوره عمل رانقل سوى دئ، خو د دوی ټولو موخه يوه ده.

(۱) متفق اليه وقال المنذري في الترغيب رواه البخاري ومسلم وغيرهما عن غير واحدمن الصحابة.

(۲) جامع صغير.

مأخذ: د لمانځه فضائل